കോവിഡ് വാക്സിൻ അന്തിക്രിസ്തുവിന്റെ വാഴ്ചയിലേക്കുള്ള നീക്കത്തിനു മുന്നോടിയാണെന്ന് അമേരിക്കൻ പാസ്റ്റർ

ഫ്ലോറിഡ: കോവിഡ്-19 വാക്സിൻ അന്തിക്രിസ്തുവിന്റെ വാഴ്ചയിലേക്കുള്ള നീക്കത്തിനു മുന്നോടിയായതിനാൽ അത് എടുക്കരുതെന്നും ഈ വാക്സിന്റെ ഉപയോഗം ശരീരത്തിലെ ഡി.എൻ.എ ഘടനയ്ക്ക് മാറ്റം വരുത്തുമെന്നും തന്റെ സഭാജനങ്ങൾക്ക് മുന്നറിയിപ്പുമായി പാസ്റ്റർ. മിയാമി ആസ്ഥാനമായി പ്രവർത്തിക്കുന്ന കിംഗ് ജീസസ് ഇന്റർനാഷണൽ മിനിസ്ട്രിയുടെ സ്ഥാപക പെന്തക്കോസ്ത് പാസ്റ്ററും ട്രംപ് അനുഭാവിയുമായ ഗില്ലെർമോ മാൽഡൊണാഡോ ആണ് ഞായറാഴ്ച തന്റെ ഇടവകക്കാർക്ക് വാക്സിനിനെക്കുറിച്ച് മുന്നറിയിപ്പ് നൽകിയത്.

“എതിർക്രിസ്തുവിന്റെ ഭരണത്തിലേക്കുള്ള ഘടന” തയ്യാറാക്കാനുള്ള പദ്ധതിയുടെ ഭാഗമാണിതെന്ന് അദ്ദേഹം പറഞ്ഞു. ഈ വാക്സീൻ ഉപയോഗിക്കുന്നതിനു പകരം ‘ദൈവിക പ്രതിരോധശേഷിയിൽ വിശ്വസിക്കുന്നതിനും’ അദ്ദേഹം തന്റെ സഭയോട് ആഹ്വാനം ചെയ്തു. വെളിപ്പാട് പുസ്തകത്തിലെ മൃഗത്തിന്റെ മുദ്രയുടെ ഭാഗവും മറ്റും ഉദ്ധരിച്ചു കൊണ്ടായിരുന്നു പാസ്റ്ററുടെ പ്രസംഗം.