തെലങ്കാനയില്‍ നിര്‍മ്മാണത്തിലിരുന്ന ആരാധനാലയം സുവിശേഷ വിരോധികള്‍ തകര്‍ത്തു

ഹൈദരാബാദ്: തെലങ്കാനയില്‍ നിര്‍മ്മാണ ജോലികള്‍ നടന്നുവന്ന ചര്‍ച്ച് കെട്ടിടം സുവിശേഷ വിരോധികള്‍ ഇടിച്ചു നിരത്തി. ജനുവരി 20-ന് മഹബുബാബാദ് നഗരത്തില്‍ കഴിഞ്ഞ 22 വര്‍ഷമായി പ്രവര്‍ത്തിക്കുന്ന ഗത്ശെമെന പ്രാര്‍ത്ഥനാ മന്ദിരം സഭയുടെ നിര്‍മ്മാണത്തിലിരുന്ന ചര്‍ച്ച് കെട്ടിടമാണ് ഒരു സംഘം തീവ്ര വര്‍ഗ്ഗീയ വാദികള്‍ തകര്‍ത്തത്. സ്ഥലത്തെ ബുര വെങ്കണ്ണയുടെ നേതൃത്വത്തിലായിരുന്നു അതിക്രമം. പാസ്റ്റര്‍ മുഹമ്മദ് അഫ്സല്‍ പോൾ ശുശ്രൂഷിക്കുന്ന ഈ സഭയില്‍ നൂറോളം വിശ്വാസികള്‍ കര്‍ത്താവിനെ ആരാധിക്കാനായി കടന്നു വരാറുണ്ട്.

നേരത്തെ താല്‍ക്കാലിക കെട്ടിടമായിരുന്നു ഇവിടെ. പുതിയ ആരാധനാലയത്തിന്റെ പണിയായിരുന്നു നടന്നു വന്നത്. അക്രമികള്‍ കെട്ടിടത്തിന്റെ തൂണുകളും ഭിത്തിയും ഇടിച്ചു നിരത്തി. മുമ്പ് ഈ സ്ഥലത്ത് ഒരു ക്ഷേത്രം നിന്നിരുന്നുവെന്നും അത് അടച്ചതിനുശേഷമാണ് ചര്‍ച്ച് പണിതതെന്നുമാണ് അക്രമികളുടെ വാദമെന്ന് പാസ്റ്റര്‍ അഫ്സല്‍ പറഞ്ഞു. പ്രദേശത്തെ മറ്റു സഭാ പാസ്റ്റര്‍മാരുടെ നേതൃത്വത്തില്‍ പോലീസില്‍ പരാതി നല്‍കി. കൂടുതല്‍ അന്വേഷണം നടത്തി നടപടി എടുക്കുമെന്നാണ് പോലീസ് പറഞ്ഞത്.