കാരുണ്യഹസ്തമായി കോന്നിയിലെ ഒരുകൂട്ടം യുവജനങ്ങൾ

കോന്നി: ചർച്ച് ഓഫ് ഗോഡ് ഇൻ ഇന്ത്യ കോന്നി സഭയുടെ പുത്രിക സംഘടനയായ വൈ പി ഇ യുടെ നേതൃത്വത്തിൽ വിവിധ കോവിഡ് പ്രവർത്തനങ്ങൾ നടന്നു വരുന്നു.ഈ ദിവസങ്ങളിൽ കോവിഡിന്റെയും ലോക്ഡൗണിന്റെയും പശ്ചാത്തലത്തിൽ ഏറെ ദുരിതമനുഭവിക്കുന്ന കുടുംബങ്ങളിൽ ഭക്ഷ്യധാന്യ കിറ്റ് വിതരണം, കോന്നിയിലും അനുബന്ധിതപ്രദേശങ്ങളിലെ തെരുവുകളിൽ സേവനമനുഷ്ഠിക്കുന്ന പോലീസ് ഉദ്യോഗസ്ഥർക്കും സ്റ്റുഡൻസ് കേഡറ്റുമാർക്കും ആഹാരവും കുടിവെള്ളവും നൽകി വരുന്നു.അതിതീവ്രമായിതുടരുന്ന കോവിഡ് രണ്ടാം തരംഗത്തിൽ ബുദ്ധിമുട്ടുന്നവർക്ക് ഏറെ ആശ്വാസമായി കോന്നി പ്രവർത്തകരുടെ നേതൃത്വത്തിൽ നേരത്തെതന്നെ ‘കോവിഡ് ഹെൽപ്പ് ഡെസ്ക്ക്’ പ്രവർത്തനം ആരംഭിച്ചിരുന്നു.കോവിഡ് വാക്സിനേഷന് ആവശ്യമായ രജിസ്‌ട്രേഷൻ,അടിയന്തരമരുന്നുകൾ എത്തിച്ചു കൊടുക്കുക,ആവശ്യമുളളവർക്ക് വാഹന ക്രമീകരണം, ബുദ്ധിമുട്ട് അനുഭവിക്കുന്നവർക്ക് ഭക്ഷണകിറ്റ് എത്തിച്ചു നൽകുക തുടങ്ങിയ കർമ്മപദ്ധതികൾക്കാണ് ഹെൽപ്പ് ഡെസ്ക്ക് നേതൃത്വം നൽകി വരുന്നത്.