രഹസ്യം ചോരില്ല! സർക്കാരിന്റെ സ്വന്തം വാട്സാപ് പുറത്തിറങ്ങി, പേര് ‘സന്ദേശ്’

ശാലോം ധ്വനി ലേഖകൻ

ഡിജിറ്റൽ ഇന്ത്യ പദ്ധതിയുടെ ഭാഗമായി വാട്സാപ്പിന് പകരമായി പുതിയ ആപ്പ് പുറത്തിറക്കി. നിലവിൽ സർക്കാർ ഉദ്യോഗസ്ഥൻമാർ ഉപയോഗിക്കുന്ന ആപ്പിന്റെ പേര് ‘സന്ദേശ്’ എന്നാണ്. ഒരു സംഘം സർക്കാർ ഉദ്യോഗസ്ഥർ സ്വദേശി വാട്സാപ് ഉപയോഗിച്ച് തുടങ്ങിയതായാണ് റിപ്പോർട്ട്. വാട്സാപ്പിന് സമാനമായ ചാറ്റിങ് മെസഞ്ചർ പുറത്തിറക്കുമെന്ന് നേരത്തെ തന്നെ സർക്കാർ സൂചന നൽകിയിരുന്നു.

എന്നാൽ, ആപ്ലിക്കേഷന്റെ ഔദ്യോഗിക അവതരണം എപ്പോൾ നടക്കുമെന്നത് സംബന്ധിച്ച വിവരങ്ങൾ ഇപ്പോൾ ലഭ്യമല്ല. gims.gov.in പേജിലാണ് സന്ദേശ് ആപ്പിന്റെ വിവരങ്ങൾ ലഭ്യമായിട്ടുള്ളത്. ഐഒഎസ്, ആൻഡ്രോയിഡ് പ്ലാറ്റ്ഫോമുകളിൽ സന്ദേശ് ആപ്പ് ഉപയോഗിക്കാം. ആപ്പ് വഴി ഉപയോക്താക്കൾക്ക് വോയ്സ്, ഡേറ്റാ കൈമാറ്റം പോലുള്ള സേവനങ്ങൾ ഉപയോഗിക്കാൻ കഴിയും. ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയത്തിനു കീഴിലുള്ള എൻഐസിയാണ് ആപ്പിന് പിന്നിൽ പ്രവർത്തിക്കുന്നത്.