റോം: വിശ്വാസത്തിന്റെ പേരിൽ പീഡനവും വിവേചനവും നേരിടുന്ന ക്രിസ്ത്യാനികളുടെ എണ്ണം ലോകത്താകമാനം 38.8 കോടിയായി ഉയർന്നതായി ഓപ്പൺ ഡോർസിന്റെ ‘വേൾഡ് വാച്ച് ലിസ്റ്റ് 2026’ റിപ്പോർട്ട്. കഴിഞ്ഞ വർഷത്തെ അപേക്ഷിച്ച് 80 ലക്ഷം പേരുടെ വർധനവാണ് രേഖപ്പെടുത്തിയിരിക്കുന്നത് — ഇതുവരെയുള്ളതിൽ ഏറ്റവും ഉയർന്ന കണക്ക്.
പീഡനം നേരിടുന്നവരിൽ 20.1 കോടി പേർ സ്ത്രീകളും പെൺകുട്ടികളുമാണെന്നും, 11 കോടി പേർ 15 വയസ്സിൽ താഴെയുള്ള കുട്ടികളാണെന്നും ഓപ്പൺ ഡോർസ് ഡയറക്ടർ ക്രിസ്ത്യൻ നാനി വത്തിക്കാൻ ന്യൂസിനോട് പറഞ്ഞു. “ഖേദകരമെന്നു പറയട്ടെ, ഇതും ഒരു റെക്കോർഡ് വർഷമാണ്” എന്നായിരുന്നു അദ്ദേഹത്തിന്റെ പ്രതികരണം.
‘അതിതീവ്ര’ പീഡനം 15 രാജ്യങ്ങളിൽ
ക്രൈസ്തവ വിരുദ്ധ പീഡനം “അതിതീവ്രം” എന്ന നിലയിലുള്ള രാജ്യങ്ങളുടെ എണ്ണം 13ൽ നിന്ന് 15 ആയി വർധിച്ചു. ക്രിസ്ത്യാനിയായിരിക്കുക ഏറ്റവും അപകടകരമായ രാജ്യമെന്ന നിലയിൽ ഉത്തര കൊറിയ ഇത്തവണയും ഒന്നാം സ്ഥാനത്ത് തുടരുന്നു. സൊമാലിയ, എറിത്രിയ, ലിബിയ, അഫ്ഗാനിസ്ഥാൻ, യെമൻ, സുഡാൻ, മാലി, നൈജീരിയ, പാകിസ്ഥാൻ, ഇറാൻ, ഇന്ത്യ, സൗദി അറേബ്യ, മ്യാൻമർ, സിറിയ എന്നീ രാജ്യങ്ങളും ഈ പട്ടികയിലുണ്ട്.
സിറിയ ഇത്തവണ “ഉയർന്ന” വിഭാഗത്തിൽ നിന്ന് “അതിതീവ്ര” വിഭാഗത്തിലേക്ക് മാറി. അലപ്പോയിലെ സമീപകാല ഏറ്റുമുട്ടലുകൾ വ്യക്തമാക്കുന്നതുപോലെ, പുതിയ ഭരണനേതൃത്വം ഇപ്പോഴും ഭാഗികമായി ഛിന്നഭിന്നമായി തുടരുന്നതാണ് അവിടത്തെ ക്രിസ്ത്യാനികളെ അപകടത്തിലാക്കുന്നതെന്ന് നാനി ചൂണ്ടിക്കാട്ടി. പത്തു വർഷം മുൻപുള്ളതിനെക്കാൾ ലക്ഷക്കണക്കിന് പേർ കുറഞ്ഞ്, സിറിയയിൽ ഇന്ന് ഏകദേശം മൂന്നു ലക്ഷം ക്രിസ്ത്യാനികൾ മാത്രമാണ് അവശേഷിക്കുന്നതെന്നും അദ്ദേഹം കൂട്ടിച്ചേർത്തു.
കൊല്ലപ്പെട്ടവർ ദിവസം ശരാശരി 13 പേർ
വിശ്വാസത്തിന്റെ പേരിൽ കൊല്ലപ്പെട്ട ക്രിസ്ത്യാനികളുടെ എണ്ണം കുറച്ചുകാലത്തെ ഇടിവിനുശേഷം വീണ്ടും ഉയർന്നു — 4,476ൽ നിന്ന് 4,849 ആയി, അതായത് ദിവസം ശരാശരി 13 പേർ. ആഗോള കണക്കിന്റെ ഏകദേശം 70 ശതമാനവും, 3,490 പേരും നൈജീരിയയിലാണ് — അക്രമത്തിന്റെ പ്രഭവകേന്ദ്രമായി ആ രാജ്യം തുടരുന്നു.
വിശ്വാസത്തിന്റെ പേരിൽ അറസ്റ്റിലായവരുടെ എണ്ണത്തിൽ കാര്യമായ മാറ്റമില്ല (4,744ൽ നിന്ന് 4,712), തട്ടിക്കൊണ്ടുപോകലുകൾ കുറഞ്ഞു (3,775ൽ നിന്ന് 3,302). ദേവാലയങ്ങൾക്കു നേരെയുള്ള ആക്രമണങ്ങളും (7,679ൽ നിന്ന് 3,632) വീടുകൾക്കും കടകൾക്കും നേരെയുള്ള ആക്രമണങ്ങളും (28,368ൽ നിന്ന് 25,794) കുറഞ്ഞപ്പോൾ, പീഡനം, ബലാത്സംഗം, നിർബന്ധിത വിവാഹം എന്നിവയ്ക്ക് ഇരയായവരുടെ എണ്ണം 3,944ൽ നിന്ന് 5,202 ആയി ഉയർന്നു.
ആഫ്രിക്കയിൽ പ്രത്യേക ശ്രദ്ധ
ദുർബലമായ ഭരണകൂടങ്ങൾ ക്രിസ്ത്യാനികളെ അക്രമത്തിന് വിട്ടുകൊടുക്കുന്ന സാഹചര്യം കണക്കിലെടുത്ത്, സബ്-സഹാറൻ ആഫ്രിക്കയെ ഈ വർഷത്തെ “പ്രത്യേക നിരീക്ഷണ” മേഖലയായി ഓപ്പൺ ഡോർസ് അടയാളപ്പെടുത്തിയിട്ടുണ്ട്.
“ക്രൈസ്തവികതയുടെ ഗുരുത്വകേന്ദ്രം ആഫ്രിക്കയിലേക്ക് മാറിയിരിക്കുന്നു; എന്നാൽ അവിടെയാണ് അത് ഏറ്റവുമധികം ആക്രമിക്കപ്പെടുന്നതും” — ലോക ക്രൈസ്തവ ജനസംഖ്യയുടെ ഏകദേശം എട്ടിലൊന്ന് വസിക്കുന്ന ഭൂഖണ്ഡത്തെക്കുറിച്ച് നാനിയുടെ വാക്കുകൾ ഇങ്ങനെ. ആഭ്യന്തരയുദ്ധം നിലനിൽക്കുന്ന സുഡാനു പുറമേ നൈജീരിയ, മാലി, നൈജർ, ബുർക്കിന ഫാസോ, ഡെമോക്രാറ്റിക് റിപ്പബ്ലിക് ഓഫ് കോംഗോ, മൊസാംബിക് എന്നിവയും ഗുരുതര സാഹചര്യമുള്ള രാജ്യങ്ങളിൽ ഉൾപ്പെടുന്നു. ഈ ദുർബല സാഹചര്യങ്ങളിൽ സാമ്പത്തിക ഘടകങ്ങളും മതപരമായ മാനവും ഒരുമിച്ചു ചേരുന്നതാണ് ആക്രമണങ്ങൾക്കു പിന്നിലെന്നും റിപ്പോർട്ട് നിരീക്ഷിക്കുന്നു.
നൈജീരിയയിലെ ആക്രമണങ്ങൾ
റോമിലെ ഇറ്റാലിയൻ സെനറ്റിലെ “നാസിരിയയിലെ വീരമൃത്യു വരിച്ചവർ” ഹാളിലാണ് വേൾഡ് വാച്ച് ലിസ്റ്റ് 2026 പ്രകാശനം ചെയ്തത്; വർധിച്ചുവരുന്ന അരക്ഷിതാവസ്ഥ ഏറ്റവുമധികം ബാധിച്ച നൈജീരിയയിൽ നിന്നുള്ള ഒരു ദൃക്സാക്ഷിയുടെ വിവരണവും ചടങ്ങിൽ ഉണ്ടായിരുന്നു.
ഡിസംബർ 29ന് അഡമാവ സംസ്ഥാനത്ത് ഇസ്ലാമിക് സ്റ്റേറ്റ് വെസ്റ്റ് ആഫ്രിക്ക പ്രോവിൻസ് (ISWAP) നടത്തിയ ആക്രമണത്തിൽ 14 പേരും, ജനുവരി 4ന് നൈജർ സംസ്ഥാനത്തെ ഡെമയിലെ ഒരു ചന്തയിൽ അജ്ഞാതരായ ആയുധധാരികൾ നടത്തിയ ആക്രമണത്തിൽ ഡസൻ കണക്കിന് പേരും കൊല്ലപ്പെട്ടു.
