ഡാളസ്: ആഗോളതലത്തിൽ പ്രത്യേകാൽ ഭാരതത്തിൽ ദിനംപ്രതി വർദ്ധിച്ചു വരുന്ന ക്രൈസ്തവ പീഡനങ്ങളുടെ സാഹചര്യത്തിൽ പീഡിത ക്രൈസ്തവർക്ക് ഐക്യദാർഡ്യം പ്രഖ്യാപിച്ചു കേരള പെന്തെക്കോസ്തൽ റൈറ്റേഴ്സ് ഫോറം ഡാളസ് ചാപ്റ്റർ. സംഘടനയുടെ നേതൃത്വത്തിൽ ഒക്ടോബർ 26 ഞായറാഴ്ച പ്രാദേശിക സമയം വൈകിട്ട് 7:30 മുതൽ 9 വരെ (ഇന്ത്യൻ സമയം October 27 രാവിലെ 6 – 7.30 വരെ) ഓൺലൈനിൽ പ്രത്യേകാൽ പ്രാർത്ഥന സംഘടിപ്പിച്ചിരിക്കുന്നു. പെർസിക്യൂഷൻ റിലീഫ് സ്ഥാപകൻ പാസ്റ്റർ ഷിബു തോമസ് (ഇന്ത്യ) പങ്കെടുത്ത് മുഖ്യസന്ദേശം നൽകും.
ജനാധിപത്യത്തിനും, മതേതരത്തിനും ഊറ്റം കൊള്ളുന്ന ഭാരതത്തിന്റെ വിവിധ ഭാഗങ്ങളില്‍ തീവ്ര ഹിന്ദുത്വവാദികള്‍ നടത്തുന്ന ക്രൈസ്തവ വിരുദ്ധതയും, ക്രിസ്ത്യാനികളെ തിരഞ്ഞ് പിടിച്ച് അക്രമിക്കുന്നതും ഒരു പതിവ് സംഭവമാണ്. മിക്ക സമയങ്ങളിലും സർക്കാരിൻ്റെ ഭാഗത്തു നിന്നും പീഡിത ക്രൈസ്തവർക്ക് സംരക്ഷണം ലഭിക്കാത്തത് തികച്ചും ദൗർഭാഗ്യകരമാണെന്നും കേരള പെന്തക്കോസ്തൽ റൈറ്റേഴ്സ് ഫോറം ഡാളസ് ചാപ്റ്റർ പ്രസിഡൻ്റ് ഷാജി മണിയാറ്റ് പറഞ്ഞു. പല സംഭവങ്ങളിലും പോലീസുകാരുടെ സാന്നിധ്യത്തിൽ പോലും വിശ്വാസികൾക്ക് മർദ്ദനമേൽക്കേണ്ടി വന്നതും, ആരാധനാലയങ്ങളിൽ അതിക്രമിച്ച് കയറി ഭീകരാന്തരീക്ഷം സൃഷ്ടിച്ചതും അത്യന്തം ഹീനമാണ്. സമൂഹത്തിൽ വിദ്വേഷം പടർത്തുന്നതും, അശാന്തി വളർത്തുന്നതുമായ ഇത്തരം നടപടികൾക്ക് സർക്കാർ തലത്തിൽ കടിഞ്ഞാൺ ഇടണം. ആർക്കും ഏത് മതത്തിൽ വിശ്വസിക്കാനും തങ്ങളുടെ വിശ്വാസം ആചരിക്കാനും പ്രചരിപ്പിക്കാനുമുള്ള ഭരണഘടനാപരമായ സ്വാതന്ത്ര്യം നിലനിൽക്കുന്ന മതേതര രാജ്യമായ ഭാരതത്തിൽ മണിപ്പൂർ, ചത്തീസ്ഗഡ്, ഒഡീഷ, ജാർഖണ്ഡ്, ഉത്തർപ്രദേശ് തുടങ്ങി സ്ഥലങ്ങളിൽ ക്രൈസ്തവ പീഡനം ഒരു നിത്യസംഭവമായി മാറിയിരിക്കുകയാണ്. വെല്ലുവിളികൾക്കും, മർദ്ദനമുറകൾക്കും അടിയറവ് വെയ്ക്കാതെ വിശ്വാസത്തിൽ സ്ഥിരതയോടെ നിൽക്കുന്ന ക്രൈസ്തവ സഹോദരങ്ങളെ ഓർത്ത് പ്രാർത്ഥിക്കുവാൻ ഡാളസിലെ എല്ലാ സഭകളേയും ഏകോപിപ്പിച്ച് മധ്യസ്ഥ പ്രാർത്ഥനയ്ക്ക് ഉള്ള വേദിയാണ് ഈ പ്രാർത്ഥനാ സംഗമം എന്ന് ചാപ്റ്റർ ഭാരവാഹികൾ പറഞ്ഞു. ചാപ്റ്റർ സെക്രട്ടറി എസ്.പി. ജെയിംസ്, ട്രഷറർ രാജു തരകൻ, പ്രയർ കോർഡിനേറ്റർ പാസ്റ്റർ തോമസ് മുല്ലക്കൽ എന്നിവർ നേതൃത്വം നൽകും.
