വാർത്ത: പോൾസൺ ഇടയത്ത്
ബെഡ്ഫോർഡ്: യു.കെ.യിലെയും യൂറോപ്പിലെയും മലയാളി പെന്തക്കോസ്ത് സമൂഹത്തിന്റെ ആദ്യത്തെ ഐക്യ കൂട്ടായ്മയായ മലയാളി പെന്തക്കോസ്റ്റൽ അസോസിയേഷൻ യു.കെ. & യൂറോപ്പിന്റെ 24-ാമത് ദേശീയ സമ്മേളനം 2027 മാർച്ച് 26, 27, 28 തീയതികളിൽ ഇംഗ്ലണ്ടിലെ ബെഡ്ഫോർഡിൽ നടക്കും. ബെഡ്ഫോർഡ് മൈൽ റോഡിലുള്ള ജോൺ ബനിയൻ സ്പോർട്സ് ആൻഡ് ഫിറ്റ്നസ് സെന്ററാണ് വേദി.
എം.പി.എ. പ്രസിഡന്റ് പാസ്റ്റർ ജെയിംസ് സാമുവേൽ സമ്മേളനം ഉദ്ഘാടനം ചെയ്യും. “ഉത്തമമായ സമ്പത്ത്” (എബ്രായർ 10:34) എന്ന ചിന്താവിഷയത്തെ അധികരിച്ച് റവ. ഡോ. ഷാജി കെ. ദാനിയേൽ, റവ. ജോയ് തോമസ് എന്നിവർ ദൈവവചനം ശുശ്രൂഷിക്കും. ബ്രദർ ജിബിൻ ടൈറ്റസ് ഹെബ്രോൻ ആരാധനയ്ക്ക് നേതൃത്വം നൽകും.
വെള്ളിയാഴ്ച രാവിലെ ആരംഭിക്കുന്ന സമ്മേളനം ഞായറാഴ്ച പൊതു ആരാധനയോടെ സമാപിക്കും. സഹോദരിമാർക്കുള്ള പ്രത്യേക സമ്മേളനവും യുവജനങ്ങൾക്കായുള്ള പ്രത്യേക യോഗങ്ങളും ഇതിനോടനുബന്ധിച്ച് നടക്കും.
ഏറ്റവും വിപുലമായ രീതിയിൽ അടുത്ത വർഷം നടക്കുന്ന ദേശീയ സമ്മേളനത്തിന്റെ ക്രമീകരണങ്ങൾ എക്സിക്യൂട്ടീവ് കമ്മിറ്റിയുടെ നേതൃത്വത്തിൽ പുരോഗമിക്കുകയാണ്. ഏവരെയും ഹാർദ്ദമായി സ്വാഗതം ചെയ്യുന്നതായി സംഘാടകർ അറിയിച്ചു.
വൈസ് പ്രസിഡന്റ് പാസ്റ്റർ പി. സി. സേവ്യർ, സെക്രട്ടറി പാസ്റ്റർ ജിനു മാത്യു, ജോയിന്റ് സെക്രട്ടറി പാസ്റ്റർ ബിജു ദാനിയേൽ, ട്രഷറർ പാസ്റ്റർ റോജി രാജു എന്നിവരാണ് മറ്റു ഭാരവാഹികൾ.
വേദി: ജോൺ ബനിയൻ സ്പോർട്സ് ആൻഡ് ഫിറ്റ്നസ്, മൈൽ റോഡ്, ബെഡ്ഫോർഡ്, ബെഡ്ഫോർഡ്ഷയർ MK42 9TS.
കൂടുതൽ വിവരങ്ങൾക്ക്: www.mpauk.org
