കോന്നി: കോന്നി അതുല്യ ചർച്ച് സ്ഥാപകനും പ്രമുഖ സുവിശേഷ പ്രവർത്തകനുമായ പാസ്റ്റർ ജോസ് അതുല്യ ചിറ്റാരിൽ വെച്ച് നിര്യാതനായി.
ചിറ്റാർ ഐപിസി ഫിലദൽഫിയ സഭയുടെ സഭായോഗത്തിൽ ഗസ്റ്റ് സ്പീക്കറായി മുഖ്യ വചനശുശ്രൂഷ നിർവഹിച്ച ശേഷമായിരുന്നു അന്ത്യം. യോഗാനന്തരം ശരീരത്തിൽ അസ്വസ്ഥത അനുഭവപ്പെട്ടതിനെ തുടർന്ന് ഉടൻ ഹോസ്പിറ്റലിൽ എത്തിച്ചെങ്കിലും ജീവൻ രക്ഷിക്കാനായില്ല.
പെന്തക്കോസ്ത് സമൂഹത്തിൽ ദീർഘകാലം സജീവ സാന്നിധ്യമായിരുന്ന അദ്ദേഹം പിസിഐ (പെന്തക്കോസ്ത് കൗൺസിൽ ഓഫ് ഇന്ത്യ) ജനറൽ സെക്രട്ടറി, വൈസ് പ്രസിഡൻ്റ് എന്നീ പദവികൾ വഹിച്ചിട്ടുണ്ട്.
സുവിശേഷ ശുശ്രൂഷയ്ക്കൊപ്പം ബിസിനസ് രംഗത്തും വ്യക്തിമുദ്ര പതിപ്പിച്ച വ്യക്തിത്വമായിരുന്നു പാസ്റ്റർ ജോസ് അതുല്യ. തടി ഫർണിച്ചർ ബിസിനസിൽ അഗ്രഗണ്യനായിരുന്ന അദ്ദേഹം കേരളത്തിലെ വിവിധ പട്ടണങ്ങളിൽ ഫർണിച്ചർ ഷോറൂമുകളും വർക്ക്ഷോപ്പുകളും സ്ഥാപിച്ചിരുന്നു. പിന്നീട് പൂർണ്ണസമയ സുവിശേഷ പ്രവർത്തനത്തിൽ സജീവമായതോടെ ബിസിനസ് മേഖലയിൽ നിന്ന് ശ്രദ്ധ കുറയ്ക്കുകയായിരുന്നു.
സംസ്കാരം ജൂലൈ 11 ന് ശനിയാഴ്ച നടക്കും. രാവിലെ 7 ന് ഭവനത്തിലും 8.30 മുതൽ ഭവനത്തിനു സമീപമുള്ള അതുല്യ ചർച്ച് ഓഫ് ഗോഡ് സഭയിലും നടക്കുന്ന ശുശ്രൂഷകൾക്ക് ശേഷം ഉച്ചകഴിഞ്ഞ് 1.30 ന് കോന്നി ആമക്കുന്നിലുള്ള അതുല്യ ചർച്ച് ഓഫ് ഗോഡ് സെമിത്തേരിയിൽ.
